Plantun de Prouvènço

Pèr coumpara dos planto d'encò nostre

Galium corrudifolium & Myosotis discolor

Galium corrudifolium

Rubiaceae

Nom en français : Gaillet à feuilles d'asperge.

Descripcioun :
La reboulo-di-fueio-d'espargo es uno planto coumuno que trachis en mato dins li roucaio e li tepiero seco. Pòu faire fin qu'à 80 cm. L'enflourejado èi piramidalo e li petalo di flour soun acabado pèr uno pichoto arèsto. Se recounèis à si cambo e fueio primo ( = 1 mm), aquésti soun classicamen emé uno grosso costo que se vèi bèn e meme un pau enfounçado. Proche de Galium lucidum, se n'en destrìo em'aquesto costo e peréu emé la baso de la tijo di proun rufo. Coumpara emé la reboulo-lusènto que ié sèmblo proun.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 10 à 80 cm
Fueio : verticilado
Tipe bioulougico : Emicriptoufite
Cicle bioulougico : Planto renadivo

Gènre : Galium
Famiho : Rubiaceae

Ordre : Gentianales

Coulour de la flour : Blanco
Petalo : 4
Ø (o loungour) flour : 3 à 4 mm
Flourido : Printèms - Estiéu

Sòu : Ca (Si)
Autour basso e auto : Pancaro entresigna
Aparado : Noun
Mai à juliet

Liò : Roucaio - Tepiero seco - Relarg à jóuinis aubret
Estànci : Termoumediterran à Mountagnard
Couroulougi : Éurimediterrano
Ref. sc. : Galium corrudifolium Vill., 1779 (= Galium lucidum subsp. corrudifolium (Vill.) Bonnier, 1922 )

Te-vese-e-t'ame(-di-dos-coulour)

Myosotis discolor

Boraginaceae

Àutri noum : Ti-viéu-e-t'aìmi, Uei-de-l'enfant-Jèsu.

Noms en français : Myosotis bicolore, Myosotis de deux couleurs.

Descripcioun :
Aquéu te-vese-e-t'ame, coume lou dis soun noum, a de flour de dos coulour, jauno pièi bluio. Es uno planto pas trop coumuno que trachis dins li pelouso sablouso bagnado l'ivèr. Isto uno meno proche que ié dison lou te-vese-e-t'ame-doutous, Myosotis dubia, que vèn dins li mémi relarg, que fai de flour d'abord blanco, pu pichoto e que la cambo, pu grando elo, a pas jamai li fuio d'en aut "óupousado".

Usanço :
Li flour podon se bouta dins lou mesclun. Se dis que li te-vese-e-t'ame soun vertuous contro l'enflamacioun, majamen pèr lis iue ("principe di signaturo").